Grantiau Ieuenctid

• Y dyddiad cau ar gyfer ymgeisio ydi 10am ar Dydd Llun 25 Ebrill 2022. Sylwer: mae ceisiadau ar gyfer y cyfle grant hwn wedi cau bellach.

• Caiff prosiectau llwyddiannus gychwyn ym mis Mehefin a bydd rhaid eu cwblhau erbyn diwedd mis Hydref 2022. Os wyt ti’n bwriadu cynnal dy brosiect yn dy ysgol, coleg neu brifysgol, cofia ystyried gwyliau’r haf!  

Rydym yn gwahodd pobl ifanc rhwng 14-25 oed o bob cwr o’r wlad i…

‘Feddwl am syniad am brosiect i ddathlu a rhannu pam fod planhigion a / neu ffyngau brodorol y DU mor arbennig’

Rydym yn chwilio am…

• Brosiectau sy’n canolbwyntio ar blanhigion a / neu ffyngau brodorol y DU.

• Prosiectau fydd yn cynnwys pobl eraill mewn rhyw ffordd.

Dylet anelu i rannu dy brosiect gydag o leiaf 100 o bobl. Efallai bod hyn yn swnio fel lot o bobl, ond fydd hyn ddim yn anodd i’w gyflawni gyda phlatfformau ar-lein a’r cyfryngau cymdeithasol i dy helpu.

Sut fydd pobl eraill yn elwa o dy syniad prosiect? Meddwl am yr effaith positif gei di a dyweda wrthym amdano!

• Prosiectau fydd yn gwneud defnydd da o’r grant o £500 – dyweda sut y byddi’n defnyddio’r arian i greu’r effaith mwyaf.

Meddylia beth fydd angen iti ei brynu neu dalu amdano os bydd dy gais yn llwyddiannus. Gall hyn gynnwys unrhyw offer neu ddeunyddiau, hyfforddiant, adnoddau, neu gymorth arbenigol y byddi ei angen. Sylwer: ni alli ddefnyddio’r grant i dalu cyflog i dy hun.

• Prosiectau fydd yn dal y llygad a’r dychymyg - bydd yn wreiddiol a meddwl am rywbeth cyffrous!

Pwysig: Byddi angen caniatâd y perchennog tir os bydd dy brosiect yn cynnwys unrhyw weithgarwch a gynhelir mewn man cyhoeddus

• Bydd rhaid iti enwebu sefydliad ieuenctid, cymunedol neu addysgol i dy gefnogi gyda dy brosiect. Meddylia am unrhyw sefydliadau yr wyt yn rhan ohonynt eisoes. Neu, os nad oes gennyt gysylltiad eisoes, allet ti ofyn i fudiad sydd wedi ei leoli yn dy gymuned?

• Bydd dy Sefydliad Cefnogol yn chwarae rôl bwysig, gan dy helpu i redeg dy brosiect a dal y grant o £500 ar dy ran. Ni ellir rhoi’r arian mewn cyfrifon banc personol neu gyfrifon banc busnes preifat. 

• Wrth chwilio am gymorth gan sefydliad, cofia ddangos yr Arweiniad i Sefydliadau Cefnogol iddynt, fel eu bod yn gwybod beth fyddi’n ei ddisgwyl ganddynt. Cofia dithau ddarllen hwn hefyd, am fwy o fanylion ar ba sefydliadau sy’n gymwys.

• Cofia siarad trwy dy syniadau am brosiect a gweithio gyda dy Sefydliad Cefnogol i wneud yn siŵr y galli gwblhau dy brosiect yn ddiogel. Dy ddiogelwch di, a diogelwch pawb sy’n rhan o’r prosiect sydd bwysicaf, felly bydd angen iti gynllunio ar gyfer hyn yn ofalus. Mae hyn yn cynnwys cymryd camau a rhagofalon angenrheidiol i ddiogelu unrhyw bobl ifanc neu bobl agored i niwed sy’n rhan o dy brosiect ac i leihau risgiau Covid-19.

   

• Sut allet ti rannu dy brosiect ar-lein, er mwyn i bobl allu cymryd rhan ble bynnag y maen nhw? Efallai y gallet greu fideos, blog neu gylchlythyr hyd yn oed?

• Sut allet ti wneud dy brosiect yn fwy cynaliadwy’n amgylcheddol? Er enghraifft, gallet ddefnyddio dim ond compost di-fawn, casglu dŵr glaw, defnyddio cyflenwyr lleol, neu weithio gyda deunyddiau eilgylch.

• Sut wnei di sicrhau bod hi’n bosibl cyflawni dy brosiect yn yr amser penodedig? A oes angen ystyried gwyliau allai effeithio ar gyflawni’r prosiect?

• Mae Covid-19 yn dal i effeithio ar lawer o bobl mewn gwahanol ffyrdd - sut alli di wneud yn siŵr bod pawb sy’n rhan o dy brosiect yn teimlo’n gyfforddus, yn ddiogel ac wedi eu cynnwys?

Ddylai dy fideo fod dim hirach na dau funud. A dyna ni! 

Fyddi di ddim angen offer cymhleth ar gyfer hyn - mae ffôn symudol yn iawn. Dy syniad am brosiect sydd o ddiddordeb i ni, nid dy sgiliau ffilmio, ond cofia gyflwyno’r wybodaeth yn glir.

Cofia gynnwys:

1. Enw bachog i dy brosiect.

2. Dy syniad prosiect a pham dy fod am ei wneud. 

3. Eglurhad am sut y bydd yn dathlu planhigion a / neu ffyngau brodorol y DU.

4. Manylion ble fyddi di’n cwblhau dy brosiect.

5. Manylion pwy fyddi di’n eu cynnwys. Beth fyddan nhw’n ei wneud neu’n ei brofi. 

6. Crynodeb o sut y byddi di’n gwario’r £500.  

Pan fydd dy fideo’n barod, cofia gynnwys dolen iddo yn dy ffurflen gais. Gwna’n siŵr bod y ddolen ar agor i Tyfu’n Wyllt ei gweld.

Pwysig: Os byddi’n defnyddio safle rhannu fideos, fel YouTube neu Vimeo, gwna’n siŵr nad ydi dy fideo i’w gweld yn gyhoeddus. Dylet ond rhannu’r ddolen gyda’r bobl sydd angen ei gweld.

Cofia sicrhau dy fod wedi derbyn caniatâd gan bawb sydd yn y fideo ac wedi dweud wrthyn nhw y bydd yn cael ei rannu gyda. Tyfu’n Wyllt. Os wyt ti neu unrhyw berson ifanc yn y fideo cais o dan 18 oed, bydd rhaid i riant / gwarcheidwad roi caniatâd iti / iddynt gymryd rhan.

Os bydd creu fideo yn anodd i ti, rho wybod i ni yma yn Tyfu’n Wyllt. Byddwn yn barod iawn i gynnig dull amgen i bobl sydd ag anghenion mynediad penodol.

iStock/Vera petrunia

Cofia lenwi’r ffurflen ar-lein, yn cynnwys y ddolen i dy fideo.

• Gofynnir iti nodi manylion cyswllt ar dy gyfer di a dy Sefydliad Cefnogol. Dylai’r ddau ohonoch fod ar gael trwy’r haf. Gofyn i dy berson cyswllt yn dy Sefydliad Cefnogol i helpu gyda hyn.  

• Byddwn yn dy gynnwys di a dy Sefydliad Cefnogol enwebedig ym mhob gohebiaeth am dy gais a dy brosiect.

• Os wyt ti dan 18 oed, cofia wneud yn siŵr dy fod wedi derbyn caniatâd gan dy riant neu warcheidwad i wneud dy brosiect ac i greu ac anfon dy fideo cais. Byddwn yn darparu ffurflen ganiatâd ar wahân ar gyfer unrhyw sesiynau hyfforddi ar-lein.

Wedi iti ymgeisio, bydd y ceisiadau’n cael eu hasesu gan banel ieuenctid - grŵp o wirfoddolwyr ifanc. Mae aelodau’r panel wedi eu hyfforddi i asesu ceisiadau a byddant, fel grŵp, yn penderfynu pa brosiectau fydd yn cael eu hariannu.

Bydd grantiau’n cael eu dyrannu i syniadau prosiect sy’n cyflawni’r criteria a nodir gan Tyfu’n Wyllt orau, cofia ddarllen Darllen am yr hyn yr ydym yn chwilio amdano’uchod, am fanylion llawn.

Mae Tyfu’n Wyllt yn cadw’r hawl i wneud y penderfyniad terfynol ynghylch pa ymgeiswyr fydd yn derbyn grant ac ni chynhelir unrhyw drafodaeth am y penderfyniad hwn. Cei dy hysbysu os yw dy gais yn llwyddiannus trwy e-bost erbyn diwedd mis Mai. Felly cofia gadw lygad ar dy e-bost!

Pob lwc iti!

Ar wahân i bobl ifanc sydd ag anghenion ychwanegol, neu sydd angen mwy o gefnogaeth, byddwn yn annog y person ifanc sy’n ymgeisio i fod yn gyfrifol am eu prosiect.

Er mwyn gwneud hyn, bydd rhaid i bob ymgeisydd ddynodi Sefydliad Cefnogol gyda pherson cyswllt enwebedig i weithio gyda nhw.

Nid yw Tyfu’n Wyllt yn gallu gwneud taliadau i unigolion - felly, bydd Sefydliadau Cefnogol cymwys yn derbyn y grant ar ran yr ymgeisydd y maent yn ei gynorthwyo. Byddant hefyd yn helpu i reoli’r gyllideb a’r gwariant.  

Un rhan bwysig o rôl y Sefydliad Cefnogol yw sicrhau bod y person ifanc yn gallu cwblhau eu prosiect yn ddiogel, gan ddarparu arweiniad angenrheidiol a gwneud yn siŵr bod gweithdrefnau iechyd a diogelwch a diogelu digonol yn eu lle ac yn cael eu dilyn.

Gallwch gefnogi mwy nag un person ifanc, cyn belled â bod gwahaniaeth amlwg rhwng eu prosiectau.   

Mae’n bwysig nodi, tra bod tîm Tyfu’n Wyllt yn hapus iawn i helpu gyda chymorth cyffredinol yn ymwneud â defnyddio’r grant a phroses y prosiect, allwn ni ddim cynnig cyngor ar redeg y prosiect o ddydd-i-ddydd, nac elfennau ymarferol technegol. Dyma ble mae’r Sefydliad Cefnogol yn gallu helpu.

Previous Grow Wild grant recipient, Ines Stuart-Davidson/ RGB Kew

Fel Sefydliad Cefnogol bydd rhaid ichi:

1. Fod yn sefydliad hirsefydlog a pherthnasol sydd â diben elusennol neu nid-er-elw. Yn benodol:

• Grŵp gwirfoddol, ieuenctid neu gymunedol

• Corff addysgol (ac eithrio ysgolion cynradd)

• Elusen gelfyddydol

• Awdurdod Lleol neu gorff cyngor arall

• Awdurdod Iechyd

2. Gallu darparu aelod o staff neu wirfoddolwr/wraig:

• i gyfathrebu gyda Tyfu’n Wyllt

• i gefnogi’r person ifanc fel bo angen, e.e. defnyddio cyfleusterau ac offer, rhoi cyhoeddusrwydd i weithgareddau, cyngor ac arweiniad

• fydd ar gael trwy oes llawn y prosiect

3. . Bod yn ariannol gyfrifol am y prosiect gyda:

• chyfrif banc yn enw eu sefydliad, neu yn enw awdurdod lleol / corff sector cyhoeddus arall, ble fo’n briodol

NID yw’r sefydliadau canlynol yn gymwys:

• Busnesau preifat sy’n gweithredu er elw ac sydd â dim diben cymdeithasol

• Sefydliadau sydd â phwrpas masnachol yn unig

Bydd cyfrifoldeb ar bob Sefydliad Cefnogol i:

• dderbyn y grant ar ran y person ifanc sy’n ymgeisio

• sicrhau bod y cyllid yn cael ei wario fel yr amlinellir yn y cais

• cysylltu gyda Tyfu’n Wyllt os dewch i wybod nad yw’r prosiect yn cael ei drosglwyddo fel a drefnwyd

• cefnogi’r person ifanc gyda throsglwyddiad y prosiect o ddydd-i-ddydd, gan gynnwys cwrdd gyda’r person ifanc yn rheolaidd i drafod y prosiect a darparu cyngor ac arweiniad fel bo angen.

• sicrhau iechyd, diogelwch a lles pawb sy’n cyfranogi yn y prosiect. Mae hyn yn cynnwys ystyriaethau diogelu a Covid-19.

Fel rhan o’r cyfrifoldeb hwn, bydd angen i Tyfu’n Wyllt weld copi o’r dogfennau canlynol cyn rhyddhau’r grant:

• Cyfansoddiad (neu ddogfen debyg a gytunwyd gan y grŵp) yn amlinellu pwrpas ac amcanion y grŵp, neu dystiolaeth bod y sefydliad yn rhan o Awdurdod Lleol neu gorff sector cyhoeddus arall.

Mae’n bosibl y gofynnir hefyd am gopïau o’r dogfennau canlynol a thystiolaeth o wiriadau datgelu perthnasol (sy’n benodol i’r wlad unigol) os bydd cais yn llwyddiannus:

• Polisi cyfle cyfartal.

• Polisi a gweithdrefnau iechyd a diogelwch.

• Yswiriant atebolrwydd cyhoeddus sy’n addas ar gyfer y prosiect arfaethedig.

• Canllawiau gwirfoddoli (os yn bwysig i’r prosiect).

• Polisi a gweithdrefnau diogelu.

Ble fo’r prosiect yn gweithio gyda phobl ifanc dan 18 oed, unigolion a grwpiau gydag anghenion ychwanegol a / neu oedolion bregus, bydd cyfrifoldeb ychwanegol ar y Sefydliad Cefnogol i:

• sicrhau bod rhiant / gwarcheidwad y person ifanc sy’n ymgeisio i Tyfu’n Wyllt yn gwybod am y prosiect a’u bod wedi rhoi caniatâd i’w plentyn gael ei enwebu’n arweinydd y prosiect (*gweler y nodyn isod)

• sicrhau bod pob person ifanc (mewn unrhyw grwpiau a amlinellir uchod) sy’n ymddangos mewn fideo cais wedi derbyn caniatâd rhiant / gwarcheidwad i gymryd rhan

• sicrhau y derbynnir caniatâd i bob person ifanc dan 18 oed gymryd rhan mewn gweithgareddau a drosglwyddir fel rhan o’r prosiect (yn cynnwys y fideo cais)

• sicrhau bod pob aelod o staff a’r holl wirfoddolwyr sy’n gweithio gyda’r prosiect, wedi derbyn gwiriad datgelu (sy’n berthnasol i’w lleoliad yn y DU a’r gweithgareddau dan sylw) a’u bod wedi derbyn hyfforddiant priodol i gefnogi’r grŵp a’i weithgareddau.

• sicrhau bod y prosiect yn hygyrch i bob cyfranogwr - gan roi ystyriaeth benodol i grwpiau ac unigolion sydd ag anghenion ychwanegol (**gweler y nodyn isod).

• diogelu plant dan 18 oed a / neu oedolion bregus tra eu bod yn cymryd rhan yn y prosiect (yn cynnwys unrhyw weithgarwch perthnasol ar-lein ac ar y cyfryngau cymdeithasol).

* Oherwydd polisïau diogelu plant a diogelu data Kew, ble fo arweinydd y prosiect dan 18 oed, bydd Tyfu’n Wyllt wastad yn cysylltu gyda chi fel y Sefydliad Cefnogol ym mhob gohebiaeth am gais arweinydd y prosiect ac, os yn llwyddiannus, y prosiect ei hun.

**Os ydych yn cefnogi cais gan berson ifanc sydd ag anghenion ychwanegol, cofiwch gysylltu gyda Tyfu’n Wyllt i roi gwybod inni, er mwyn sicrhau ein bod yn ystyried hyn.

Pan ddaw person ifanc atoch gyda syniad am brosiect, mae’n bwysig trafod a chynllunio gyda nhw sut y gellir trosglwyddo’r prosiect yn ddiogel, yn cynnwys gweithdrefnau i ddiogelu unrhyw gyfranogwyr dan 18 oed neu oedolion agored i niwed.

Os bydd eu cais yn llwyddiannus, mae’n bosibl y gofynnir i chi ddarparu copïau o’ch polisïau a gweithdrefnau iechyd a diogelwch a diogelu i Tyfu’n Wyllt, felly cofiwch sicrhau bod y rhain wedi eu diweddaru.

Mae Tyfu’n Wyllt yn gofyn i’r bobl ifanc greu fideo dau funud o hyd, i ddweud wrthym pam eu bod yn ymgeisio am grant.

Bydd yr ymgeiswyr yn rhannu dolen i’w fideo gyda Tyfu’n Wyllt pan maent yn cwblhau a chyflwyno eu ffurflen gais fer. Dim ond staff Tyfu’n Wyllt, a’r panel o bobl ifanc sy’n penderfynu pa brosiectau i’w hariannu, fydd yn gwylio’r fideos cais.

Os yw creu fideo yn anodd i’r person ifanc yr ydych yn eu cefnogi, cysylltwch gyda Tyfu’n Wyllt i roi gwybod inni. Byddwn yn barod iawn i gynnig dull amgen i bobl sydd ag anghenion mynediad penodol.

Am fwy o fanylion a chyngor ar greu fideo, darllenwch ein arweiniad i ymgeiswyr.

Eleni, rydym yn cynnig cyfle i bob arweinydd Prosiect Ieuenctid i gymryd rhan yng nghynllun newydd Gwobr Kew i Arweinyddion Amgylcheddol Ifanc.

Bydd y rhaglen hyfforddi a’r wobr sydd wedi ei hachredu gan Kew yn cynyddu sgiliau, atgyfnerthu a chynyddu hyder arweinyddion ifanc i rannu eu diddordeb yn y byd naturiol a gyrru newid amgylcheddol yn eu cymunedau. Mae’r wobr wedi ei dylunio i weithio ochr-yn-ochr gyda’u prosiect Tyfu’n Wyllt ar bob cam, gan eu helpu i gael y gorau o’r cyfle grant hwn a throsglwyddo eu prosiect yn llwyddiannus.

Hoffem eich annog i gefnogi eich person ifanc os hoffent gymryd rhan. Bydd Tyfu’n Wyllt yn darparu sesiynau hyfforddi penodol ar-lein, mynediad i adnoddau ac adborth cyflwyniad terfynol, felly fydd dim pentwr o waith ychwanegol ar eich plât! Fodd bynnag, eich cyfrifoldeb chi fydd cynorthwyo gyda chefnogaeth dydd-i-ddydd neu gwestiynau a threfnu cyfarfodydd cynnydd i sicrhau y gall y person ifanc gwblhau’r wobr ar amser.

Rydym wedi ymrwymo i sicrhau bod y cyfle hwn yn agored i bawb. Os ydych chi’n cefnogi person ifanc sydd ag anghenion ychwanegol neu oedolyn bregus, mae Tyfu’n Wyllt yn hapus i gynnig cymorth ychwanegol a threfniadau amgen ble fo angen.

Cofiwch e-bostio Tyfu’n Wyllt neu ein ffonio ar 020 45264885 i drafod y modd gorau i gefnogi eich person ifanc.